വെള്ളമുണ്ട (വയനാട്): മുഹമ്മദ് നബി (സ) യുടെ അതിമനോഹരമായ മുന്നൂറ് ഉപദേശങ്ങൾ രണ്ട്‌ കുഞ്ഞുപുസ്തകങ്ങളിലായി
ആകർഷകമായ കെട്ടിലും മട്ടിലും അടുക്കിവെച്ച് തയ്യാറാക്കിയ ‘നബി പറയുന്നു’ ഉപഹാരം പ്രകാശിതമായി. ഞായറാഴ്ച ഇവിടെ നടന്ന ഐ എസ് എം വെളിച്ചം സംസ്ഥാന സംഗമത്തിൽ വെച്ചായിരുന്നു പ്രകാശനം.

ഇസ്‌ലാമിക പ്രസാധന രംഗത്തെ നവഭാവുകത്വമുള്ള നവാഗതരായ പ്രൊഫൗണ്ട് പ്രെസ് (കോഴിക്കോട്) ആണ് നബി പറയുന്നു വോള്യങ്ങൾ പ്രസിദ്ധീകരിച്ചിരിക്കുന്നത്. പ്രൊഫൗണ്ട് പ്രെസിന്റെ സഹോദര സ്ഥാപനമായ പ്രൊഫൗണ്ട് റ്റി വി യുടെ ഓൺലൈൻ ഹദീഥ് പരിഭാഷാ പോസ്റ്റർ പരമ്പരയായ ‘ഹദ്ദഥനാ’യിലെ ആദ്യത്തെ മുന്നൂറ്‌ നബിവചനങ്ങളുടെ ആശയങ്ങളാണ് രണ്ട് വോള്യങ്ങളിലായി ഉൾപെടുത്തിയിരിക്കുന്നത്. തട്ടവും തിട്ടൂരങ്ങളും, കെ എം മൗലവി ഓർമ്മപ്പുസ്തകം എന്നിവയാണ് പ്രൊഫൗണ്ട് പ്രെസ് പ്രസിദ്ധീകരിച്ചിട്ടുള്ള മറ്റു പുസ്തകങ്ങൾ.

കെ എൻ എം സംസ്ഥാന വൈസ് പ്രസിഡന്റ് ഡോ: ഹുസൈൻ മടവൂർ,
വയനാട് ജില്ലാ പഞ്ചായത്ത് ക്ഷേമകാര്യ സ്റ്റാന്റിംഗ് കമ്മിറ്റി ചെയർമാൻ ജുനൈദ് കൈപ്പണിക്ക്‌ നൽകി പ്രകാശനം നിർവഹിച്ചു. നബി പറയുന്നു വോള്യങ്ങളെ വെളിച്ചം സമ്മേളന നഗരി ഹൃദയപൂർവം എതിരേറ്റു. സമ്മേളന പ്രതിനിധികൾ കോപ്പികൾ സ്വന്തമാക്കാൻ മത്സരിച്ച കാഴ്ച പ്രവാചകാധ്യാപനങ്ങൾ നൂറ്റാണ്ടുകൾക്കിപ്പുറവും വിശ്വാസിമനസ്സുകളിൽ ചെലുത്തുന്ന സ്വാധീനത്തിന്റെ പ്രകടനം കൂടിയായി. നബി പറയുന്നു ആവശ്യമുള്ളവർക്ക് +91 8921739075 എന്ന നമ്പറിൽ ബന്ധപ്പെടാം എന്ന് പ്രസാധകർ അറിയിച്ചു.

പ്രകാശന ചടങ്ങിൽ ഐ എസ്‌ എം സംസ്ഥാന സെക്രട്ടറി സിറാജ് ചേലേമ്പ്ര നബി പറയുന്നു വോള്യങ്ങളെ പരിചയപ്പെടുത്തി സംസാരിച്ചു.
ഐ എസ്‌ എം സംസ്ഥാന പ്രസിഡന്റ് ശരീഫ് മേലേതിൽ, പ്രൊഫൗണ്ട് പ്രെസ് ഡയ്റക് റ്റർ മുസ്തഫാ തൻവീർ, ഐ എസ് എം സംസ്ഥാന ഭാരവാഹികളായ കെ എം എ അസീസ്, ശിഹാബ് തൊടുപുഴ, കെ എൻ എം ജില്ലാ പ്രസിഡന്റ് പോക്കർ ഫാറൂഖി, സയ്യിദ് അലി സ്വലാഹി, കെ. അബൂട്ടി മാസ്റ്റർ, ബഷീർ കോറോം, യഹ്‌യാ കാളികാവ് തുടങ്ങിയവർ സംബന്ധിച്ചു.

Admin